Picha za maandamano ya Wakongo mjini Paris kupinga ukosefu wa usalama katika Jamhuri ya Kidemokrasia ya Kongo
Jumamosi hii, Disemba 2, mamia ya Wakongo walistahimili baridi ya Paris ili kushiriki maandamano dhidi ya ukosefu wa usalama unaokumba mashariki mwa Jamhuri ya Kidemokrasia ya Kongo (DRC). Maandamano hayo yaliyoandaliwa na muungano wa Kongo Lisanga Bana Mboka yalilenga kukemea unyanyasaji na migogoro ya kivita inayoathiri eneo la Kivu haswa.
Waandamanaji hao, wakipeperusha bendera za Kongo na kubeba mabango ya kutaka kukomeshwa kwa hali ya kutokujali na kulindwa kwa raia, waliandamana kutoka katikati mwa Paris, kutoka Place de la Bastille, hadi Place de la Nation, hivyo kuchukua umbali wa takriban kilomita 25.
“Dunia nzima lazima isiendelee kufumbia macho kile kinachotokea Kongo. Haya ni mauaji ya kimbari yaliyosahaulika. Tuko hapa kuwakumbusha hilo,” alisema mmoja wa waandamanaji wakati wa maandamano hayo.
Sambamba na uhamasishaji huu, mkusanyo wa fedha, nguo na mahitaji mengine uliandaliwa ili kuwasaidia watu waliokimbia makazi yao na wahanga wa migogoro ya kivita mashariki mwa DRC. Michango hii itatumwa mwaka ujao kusaidia watu walioathiriwa na ghasia hizi.
Maandamano haya yanakumbusha udharura wa hali ya usalama nchini DRC na umuhimu wa uhamasishaji wa kimataifa ili kukomesha migogoro ya silaha na kuhakikisha amani katika eneo la Kivu. Wakongo walioko ughaibuni wanaendelea kuhamasishana na kutoa sauti zao ili haki itendeke na ukatili dhidi ya raia ukome.