Waathiriwa wa kundi maarufu la Lord’s Resistance Army (LRA) nchini Uganda wameelezea kusikitishwa na hukumu iliyotolewa na majaji kwa kamanda wa zamani.
Thomas Kwoyelo alihukumiwa kifungo cha miaka 40 jela kwa makosa ya uhalifu wa kivita yakiwemo mauaji, ubakaji, utumwa, uporaji, utesaji na utekaji nyara.
Hata hivyo, atatumia miaka 25 tu jela, akiwa tayari amekaa rumande kwa miaka 15.
Grace Apio, mwathiriwa, alisema hukumu hiyo ilionekana kuwa nyepesi kwa wale ambao walikuwa wahasiriwa wa ukatili wa kutisha uliofanywa na waasi wa LRA.
“Tunajisikia vibaya sana, mali yetu ambayo imeharibiwa, watoto ambao tumewazaa utumwani, tunateseka sana,” alisema.
Apio aliongeza kuwa hukumu hiyo itatuma ujumbe usio sahihi kwa watu wanaotaka kuanzisha vita nchini Uganda.
“Unaweza kufanya ukatili huu na kuishia na hukumu nyepesi, kisha urudi kwa jamii na kuendelea na maisha yako,” aliongeza.
Kwoyelo alikwepa adhabu ya kifo kwa sababu alitekwa nyara na kundi la waasi alipokuwa bado mtoto na alionyesha majuto.
Kundi la LRA lilianzishwa mwishoni mwa miaka ya 1980 kwa lengo la kupindua serikali na kuunda dola kulingana na tafsiri ya Amri Kumi na kiongozi wake, Joseph Kony.
Waasi wamepigana na serikali kutoka kambi zao kaskazini mwa nchi kwa karibu miongo miwili.
Walikuwa maarufu kwa ukatili wao, ambao ulijumuisha kukatwa miguu na midomo ya wahasiriwa, pamoja na utekaji nyara wa watoto ili kuwatumia kama wapiganaji na watumwa wa ngono.
Kwoyelo amekanusha tuhuma dhidi yake.
Aliiambia mahakama kuwa ni Kony pekee anayeweza kujibu uhalifu wa LRA, na kusisitiza kuwa mwanachama yeyote wa kundi hilo la waasi atakabiliwa na kifo kwa kutomtii mbabe wa kivita.
Wakili wake, Evans Ochieng, alisema baada ya kushauriana na mteja wake, waliamua kukata rufaa dhidi ya uamuzi huo kutokana na kukutwa na hatia na hukumu.
“Hatutasema hapa kwenye kamera kwamba tunadhani hukumu hizo ni kinyume cha sheria, lakini tutawapinga mbele ya mahakama ya rufaa,” alisisitiza.
Human Rights Watch inaita kesi hii ya kihistoria “fursa adimu ya haki” kwa wahasiriwa wa vita vya miongo miwili kati ya wanajeshi wa Uganda na LRA.
Wakati shinikizo la kijeshi lilipolazimisha LRA kuondoka Uganda mwaka 2005, waasi walitawanyika katika maeneo mbalimbali ya Afrika ya kati.
Kundi hilo limedhoofika katika miaka ya hivi karibuni na ripoti za mashambulizi ya LRA ni nadra. Kony bado yuko huru na alishtakiwa na Mahakama ya Kimataifa ya Uhalifu mwaka 2005.