Baada ya miezi kadhaa ya sintofahamu, ubalozi wa Ufaransa nchini Niger ulifunga milango yake kwa mara ya mwisho Januari 2, na kumaliza mzozo wa miezi mitano kati ya viongozi wapya wa nchi hiyo na Paris.
Uamuzi huu ulikaribishwa na wakaazi, wanasiasa na watendaji wa mashirika ya kiraia, ambao wanaona kufungwa huku kama hatua katika mwelekeo sahihi kwa mustakabali wa Niger.
Mashirika ya kiraia ya M62, ambayo yaliunga mkono mapinduzi ya mwaka jana yaliyomwondoa Rais Mohamed Bazoum, yalikaribisha kufungwa kwa ubalozi huo. Kundi hilo kwa muda mrefu limetoa wito kwa mamlaka ya Niger kuvunja uhusiano na Ufaransa, kuandaa maandamano dhidi ya jeshi la Ufaransa mwishoni mwa 2022.
Vuguvugu hilo linaamini kuwa Ufaransa inapaswa pia kufunga biashara zake nchini Niger.
“Itakuwa haki kwa watu wa Niger kwamba Ufaransa inapoondoka na ubalozi wake, pia inaondoka na makampuni ambayo yamekuwa yakinyonya nchi yetu kwa muda mrefu,” anasema Bana Ibrahim, mwanachama wa M62.
Uamuzi wa Ufaransa wa kufunga ubalozi wake ulichukuliwa Disemba 22, wakati huo huo kuwaondoa wanajeshi wake wa mwisho kutoka Niger.